لاباس عليكوم، كيف دايرين مع هاد الجو المتقلب ديال أبريل؟؟؟ نتمنى تكونو بخير و فصحة جيدة
كيما شفتو وخا الشتيوة مزال ما سخات بينا و كتصب مرة مرة. ولكن الحال بدا كيسخن و بدينا كنتشهاو العصائر و المثلجات، و هاد الخليط هو مزيج بيناتهوم. بارد و لذيييذ.
نبداو على بركة الله.
المقادير:
نص لتر حليب + 2 معالق كبار مايزينا + 2 معالق كبار سنيدة (أو حسب الرغبة)+ 2 خنيشات فانيل( أو م ص مركز فانيل)
نص لتر عصير برتقال + 2 م ك مايزينا + 2 م ك سنيدة
حبات من الفاكهة نقطعوهم صغار
الطريقة:
كنديرو الحليب فوق النار كنزيدوه السكروالفانيل و نحركو، كناخدو كاس نديرو فيه مايزينا و شوية من الحليب ولا الما، نخلطو مزيان و نزيدوه على الحليب و نحركو بالطراب بدون توقف باش ما يتكورش و ما يلصقش لينا. و تكون العافية مهيلة. حتى يقبط الخليط و يولي على شكل كريم. نخلوه يبرد و نخلطو معاه حبات ديال الفواكه مقطعين صغار ( أنا استعملت التفاح و لكن يمكن تختاري اللي حبيتي)
و تعمري بيه الكويسات حتى للنص و تحطيه فالثلاجة.
كتاخدي عصير البرتقال كتستخدمي نفس الطريقة ولكن أنا ما ضفتش ليه طريفات دالفاكهة. كتخرجي الكويسات من الثلاجة، خاص يكون الحليب عاقد باش مايتخلطوش لينا. و نزلو الخليط بشوية.
من بعد كنزينوه إلا بغينا بالكوك أو الشعرية دالشكلاط....أنت أو ذوقك
ترجعيه للثلاجة حتى يبرد و بالصحة و الراحة.
0 commentaires:
Enregistrer un commentaire